Нырьяе шутэтскон нуналэ ке но вуылӥм, школа азьын милемыз калык пумитаз ни. Удмурт дэремъёсын нылпиос эктӥзы, кырӟазы. Пиналъёсын но дышетӥсьёсын пумиськем
бере школаысь завучен Владимир Туймурзович Жуковен вераськыса вуттӥм на. Монэ тужгес но тунсыкъяськытӥзы Татарстанын удмуртлыкез утён но азинтон ужпумъёс.
- Школаяды удмурт кылэз дышетон пумысен шуг-секытъёс кылдо-а?
- Милям удмурт кылэз весь дышето вал. 1992-тӥ арысен
программаямы
бигер кылэз но пыртӥзы. Азьвыл арняяз вить час ӟуч кыллы сётӥське вал,
эшшо вить час - удмурт кыллы. Бигер кыллы арняяз кык урок сётэмзы бере,
сое удмурт урокъёс чотын ортчытъяны косӥзы. Но
пиналъёслэн асьсэ кылзэс
ик дышетэмзы потэ. Озьы али арняяз ньыль час ӵоже удмурт кылэз дышетыны быгатӥськом на. Кылем
арысен косӥзы бырйыны, мае ми дышетом калык
культура удысъя. Ми малпамы удмурт кылэз, литератураез муромытыса сётыны. Руно
солы пумит вал. Но пиналъёсмылэн удмурт кыл борды кыстӥськонзы бадӟым. Программая 8-тӥ-9-тӥ классъёсын удмурт кыллы, литературалы
кык час гинэ сётэмын. Со туж ичи. Ми эшшо одӥг час ватсамы
на. Нылпиосмы удмурт литератураез мед тодозы кадь потэ. Уноез соос, школазэс
йылпумъяса, Удмуртие дышетскыны мыно. Оглюкетэз Казане кошке.
- Школаяды бигер нылпиос но вань, дыр. Удмурт кылъя урокъёс дыръя соос ма каро?
- Школаямы 40 дышетскисьмы - бигер, кыкез - армян. Но соос но удмурт кылэз мыло-кыдо
дышето. Тунсыкъяськонзы вань бере, малпаськомы, оло, бигер дышетскисьёслы нимысьтыз
удмурт кружок усьтоно.
- Нош удмурт книгаос, пособиос тырмыт-а?
- Дышетскон книгаосмы 80-тӥ аръёсы поттэм макеос ай. Тужгес но ёрмо бадӟым классъёсын дышетскись пиналъёс. Удмурт кылэз, литератураез дышетон пыртэмын планэ, нош учебникъёс ӧвӧл. Чеберлыко литература вань, но ӧжытгес ик. Со дыре ик бигер урокъёсты ортчытъянпонна гурезен-гурезен книгаос вутто - кулэзэ но, кулэтэмзэ но шедьтод.
Эшшо бадӟым сюлмаськонмы: малы ке удмурт журналъёс дорамы туж ӝегаса вуо. Кытӥяз ӝыны аръёс ӵоже возьмано луэ. Нош со дыре ик Германиысь журнал 10 нуналскын вуэ. Ачим мон немец кыллы дышетӥсь бере, урокъёсам со кунсьӧр журналэз кутӥсько. Мылокыдо басьтӥськом «Ӟечбур!» газетэз. «Удмурт дунне» «Советской Удмуртия» дыръяз гуртамы корка куспатыса вуэ вал. Выльдӥськон
бере калык секытгес улыны ӧдъяз, гожтӥськыны ӧз ни быгаты. Ачим мон «Удмурт дуннеез» туж яратӥсько. Азьвылэн ӵошатыса, со зол воштӥськиз ӟечез пала. Удмурт кылэн, культураен тунсыкъяськон урокъёсын гинэ уд буйга. Школаямы «Юнкор» кружок ужа. Отын пиналъёс кылбуръёс, статьяос гожъяло. Ужъёссы печатласько «Ӟечбур!» газетын но ёрос газетамы. Удмурт фольклоръя кык ансамбльмы. Калык пӧлысь кырӟан-эктонъёсты бичаса ветлӥськом. «Вуюись» ансамбльлэн кивалтӥсез Елена Абрамовна Кузьмина. Пиналъёсын нылпи садикысен ик ужа ини, вань вирын-сюлмын со та нылпиосын ӵош. Ма, кыкетӥансамбльмы но - «Чингыли» - солэн сюлмаськеменыз вордӥськиз. Кемалась ӧвӧл пыриськимы Татарстан Республикаын ортчем «Ватан» конкурсэ. Отын милям пиналъёсмы лауреат луизы. Туж потэ вылэм ансамбльмес Удмуртие но нуллэммы.
- Нош асьтэос Удмуртие ӵем-а вуылӥськоды?
- Мон Удмурт шаерын, Глазов городын, дышетскемын. Удмуртилэсь
ми туж мӧзмиськом, но ӵем вуылыны уг кылды.Али туж
тунсыкъяськиськом гурт нимынымы. Со Норья воршудлэсь кылдэм.
Урмуртиын сыӵе нимын гурт вань. Нош Селта ёросады Нырья пумиське.
Отчы ветлэммы потэ. Эскерисьёс шуо: Норья выжы Арча (Татарстанысь
туала Арск город) палан, пе, кылдэм. Бӧрысь, пе, отысь адямиос мукет
азе кошкиллям, выжыяськиллям. Удмуртиысь Норья воршуд нимын
кылдэм гуртысь мыло-кыдоослы но тунсыко луысал милемын
тодматскыны, оло, соослэн пумиськон мылкыдзы кылдоз.Кинлэн ке
милемын кусып воземез потӥз ке, электрон адресмыя мед гожтоз:
nirya - school@mail.ru. Ми тыршиськомы гуртмылэсь, калыкмылэсь
историзэ утьыны, та ласянь ӟеч эшъёс шедьтыны.
Елена Миннигараева
| 
