• В. Жуков но Н. Данилов

Татарстанысь Кукмор ёросысь Нырья гуртын 1884-тӥ арын вордскиз удмурт кылбурчи Максим Прокопьев. Ӵапак та ӟырдыт мылкыдо адями ик вал удмуртъёслэсь 1-тӥ но 2-тӥ съездъёссэс люканы кичӧлтӥсь. Со мыло-кыдо басьтӥськиз удмурт поэзиез но публицистикаез мытон но азинтон уж борды. Со ик дасяз Удмурт Автономной Республикалэсь нырысетӥ Конституцизэ но. Со дырысен трос аръёс ортчизы ке но, Татарстан Республикаысь Нырья гурт удмурт омырен шока на. Татысь шор ёзо школа нуллэ дано пиезлэсь - Максим Прокопьевлэсь - нимзэ. Кызьы азинске Бигер шаерысь удмурт школа? Секыт-а удмурт кылзэс,сям-йылолъёссэс, ма, огъя удмурт мылкыдзэс утьыны? Та сярысь сюлмысь кенешимы Нырья шор ёзо школалэн директореныз Николай Николаевич Даниловен.

Нырья черкогурт пурты пыдэсын кадь интыяськемын. Котырак вож турынэн шобырскем гурезё интыос. Гуртэ нуись сюрестӥ васькыку, эсьмаса, кӧт ик шурдэ. «Пурты пыдсы» васькем бере гинэ усьтӥське зэмос гурт суред: вӧл-вӧл, вож писпуосы выем урамъёс, пу юртъёс, кыдёкын ик ӧвӧл - шур, нош со вамен - сюбег выж. Татын сокем гань-гань - дырлэсь ортчемзэ ик валамысь дугдӥськод.

Нырья школалэн азбараз арлы быдэ пушйись сяськаос пӧлы пуктэмын бадӟым из. Солэн выжыяз пусйыса кельтэмын: «Татчы инъямын луоз удмурт калыклэн визьмо пиезлы М. Прокопьевлы сӥзем памятник». Кема-а возьманы кылиз на солэсь татчы пуксёнзэ, тунсыкъяськи мон.

- Максим Прокопьевлы памятник кемалась дась ини, - мыньпотэ Николай Данилов.

- Кытын бен со? - ымылэсь усьтӥськемзэ ик ӧй вала мон.

- Сое лэсьтыны курыса, Нырьяысь, ма, быдэс Кукмор ёросысь дышетӥсьёс вазиськиллям Санкт-Петербургысь скульпторлы. Но та вал ини кылем даурлэн 90-тӥ аръёсаз. Питерысь скульптор ужзэ ӝог быдэстэм. Памятникез отысь вайыны нырьяослы люкетӥзы выльдӥськон аръёс, - валэктӥз директор. Зэм, со вакытэ Николай Николаевич школалэн кивалтӥсез ӧй вал на ай. Нырьяысь школаез йылпумъяса, тодон-валанзэ будэтыны со вамыштӥз Удмурт кун университетэ. Экзаменъёссэ ӟеч сётыса дышетскыны пыриз. Но вузын визь-нод люканы, шонерзэ вераса, солэн сюлмыз ӧз чида. Ма, армие ветлытэк, шорам нылъёс но уз учке ук, малпаз соку егит пияш. Озьы тӥни, дышетсконзэ уретыса, со кошкиз армие зэмос пиосмуртлэн школаез пыр потыны. Отысь вуыса, егит пиосмуртлэн тодон-валан дуннее кыстӥськон мылкыдыз ӧз кысы. Николай табере тодэ ни вал аслыз кулэ луись удыссэ: пиналъёслы визь-нод сётон. Озьы со дышетскыны пыриз Казаньысь педагогикая колледже, нош собере - Казаньысь ик социально-юридической институтэ. Вылӥ образование басьтыса но, со ӧз дырты вордскем Нырья гуртысьтыз кошкыны. Татын ик семья кылдытӥз, выжы лэзиз. 2005-тӥ арын сое юнматӥзы Нырья шор ёзо школалы директоре.

- Ма, оло, тӥ школаен кивалтон вакытэ М. Прокопьевлы сӥзем памятникез Нырьяе вуттыны луонлык шедёз? - уг буйгаськы мон.

- Сое Санкт-Петербургысь татчы вайыны трос уксё кулэ ук, - ӝожмыталэс мылкыдын вера Николай Николаевич. - Но памятникез интыяз пуктыны кулэ - таиз сярысь азьланяз сюлмаськом одно ик. Кылем арын Нырья школа шугадӟонэ сюриз. 22-тӥ июне сильзор нуыса кошкиз школалэсь липетсэ. Школалы со 2 миллион манет тыр изъян вайиз. Ярам коть, районысь кивалтӥсьёс нырьяослы юрттӥзы. Туэ дышетскон арлы школа дась вал ини. Висъям коньдон тырмиз пушказ тупатъян ужъёс но ортчытыны. Озьы пиналъёс вамыштӥзы выльдэм школае.

- Котьма ке но мон понна туж тунсыко: кызьы Бигер шаерын азинске удмурт школа? Тӥледлы юрттӥсьёс сюро-а? - ёртӥсько Николай Даниловез.

- Удмурт культураез утён сярысь ке верано, зэм но, ми татын 
выжыосмылы бадӟым саклык висъяськом, - лад-лад вера со. - 
Кылсярысь, калык сямъёсты, йылолъёсты чакланы турттӥськом.
Пиналъёсмес дышетӥськом сюан, солдат келян гуръёсты кыр-
ӟаны.Та ласянь мылкыдмы бадӟым, но жаляса верано, секытгес 
ик шедьтыны удмурт крезьгурен дискъёс, книгаос, материалъёс.
 Удмурт шаер милемын кусыпсэ медаз ышты вылэм. Нош юрттэт 
сярысь ке кылпум поттоно, удмурт школамылы мыло-кыдо юрттэ 
бигер воргорон Газинур Хабибрахманов - Нырьялась 
«Рассвет» агрофирмалэн кивалтӥсез. Со пиналъёслы 
кузьым но басьтыны юрттэ, школамылэсь ваньбурзэ 
выльдон сярысь но сюлмаське. Татарстан Республика но
 милемыз палэнэ уг кельты. Тани алигес школамылы уксё 
висъязы Казаньысь адӟытонэ пыриськон понна. Со ужрад
 сӥземын вал калыкез дышетонлы но карьера лэсьтонлы. 
Ми возьматӥмы удмурт школаез. Ми сяна, вал на бигер, 
мордва, пор, крашин школаос. Юрттэт сётэ на 1 гектар 
мында музъем воземмы но. Отын будэтэм емыш тырме 
нылпиосты но сюдыны, палэнэ но вузаны, - пусъе директор. 
Туэез дышетскон ар йылпумъяськиз, пиналъёслэн шутэтскон 
вакытсы кутскиз. Нош директорлэн, оло, ужъёсыз эшшо но
 йылӥзы. Кылем арлы йылпумъянъёс лэсьтоно, вань янгы-
шамъёсты чакласа, азьланезлы олокӧня пӧртэм ужъёсты 
чӧлтоно.

- Азьланез сярысь малпакум, мон тодам вайисько школаямы
 дышетскись пиналъёслэсь басьтэм вормонъёссэс, - вера 
Николай Николаевич Данилов.  -Соос монэ шумпотто но 
бадӟым ужъёсы бурдъяло. Кылсярысь, Павлова Анжеликамы 
Удмуртиын, ма, Татарстанын но арысь аре ортчись удмурт 
кылъя олимпиадаосын нырысетӥ интые потэ. Бигер кылъя но 
вормисе потэмъёсмы вань. Спортлы но мугорез кыдатонлы 
бадӟым саклык висъяськом. Кылсярысь, милям школаямы 
тодон-валан но кужым ласянь кыдазы Россилэн но Татар-
станлэн чемпионъёссы: Минимуллин Ралиф, Султанов Алмаз, 
Чингазов Рамис. Туала вакытэ школаосты кыӵе ке удыс (профиль) 
бырйыны косо. Ми малпамы шаертодонлы саклык висъяны. 
Школамы луоз социально-гуманитарной, нош дышетсконмес 
радъялом «Вордскем палъёсмылэн историзы» ним улсын. 
Тӥни сыӵе малпанъёсын улэ бигер палъёсысь удмурт кивалтӥсь. 
Нырья гуртэ вуылыса, мынам сюлэмам вераны луонтэм шуныт
 мылкыд кылиз. Пичи ке но, туж кужмо гурт, малпай мон.

Туспуктэмез Е. Миннигараевалэн.

Елена Никитина

Потэмын ? № 078 (24026) от 30.05.07